و أنا الوحيد الى واقف مكانى ثابت فيه ناس أختارت سكة صابت و ناس تانيه اختارت سكة خابت
أحساس قاسى و صعب لما الناس تشوفك فاشل أبوك و أمك و أخواتك و صحابك شايفينك عاطل
قوم يا أبنى أسعى و حاول و الله غلبت أحاول ياما حاولت و قبل الجون ماييجى يطلع فاول
معنديش مهاره او حتى كوسة و حوستى حوسه و دوست بعد أخر البنزين بدوسه
فى كل مقابله شغلانه يتقالى لف نفسك بشهادتك مدد جمب أى حيط و خدلك بوسة
رجعت فلاش باك حسبت سنين عمرى 30 سنه لقيت حسبت تانى و تالت و أتخضيت
ببص فى المرايا كام شعرايه بيضة لقيت أبويا هو إلى لسه بيصرف عالبيت
بتعامل من عيلتى على انى عاله و حالتى حاله ثقتى فى نفسى راحت النجاح بقى أستحاله
نفسى أهرب من نفسى و من حالتى و من عيلتى و من الدنيا نفسى ألقى دنيا تانيه أهرب ليها و لو حتى ثانيه
و فى يوم قالهالى صاحبى و الى يدلك عالطريق ميفيدش الصاحب غير صاحبه اسمع من الصديق
قالى فيه قاعدة ضرب حلوة بالليل عاملينها سألته هاش قالى بيسه قولتله لادمنها
قالى متخافش مش ممكن تدمن من أول شكه أقنعنى بالليل شكتلى أول شكه
مفاصلى ساحت و أرتاحت و روحى راحت بكلم نفسى من جوة و برغى و من بره ساكت
همومى شبه تاهت و الرؤيه باهت فى باهت كل مشكلة كانت عندى فى الدنيا ماتت و تاهت
عدت ساعات فى ثانيه لقيت الصحبه قايمه دخلت بيتى وش الفجر عيلتى كانت نايمه
دفنت نفسى تحت البطانيه جسمى متلج نمت فى أقل من ثانيه نومه واحد متبنج
قطر الحياة بيعدى بسرعة سنه فى سنه فى سنه و أنا زى مانا من يوم ماكان عندى سنه
هيا هيا الحياه هو هو أنا أنا زهقت طهقت من الحياة تقدر تقول مليت أنا
فقت ورجعت تانى للواقع والعكننة عدى النهار بطيئ كانو كم شهر وسنة
نفسي النهار يعدى بسرعة واضرب تانى ارجع ملك زمانى وابعد عن العالم
خلونى اضرب معاهم وكل يوم اتعزم خلاص دخلت السكة والطريق بيترسم
فاجئنى صاحبي في يوم قالهالى في وشي خف تعوم اجيب فلوس منين ليا وليك نضرب كل يوم
شخشخ جيبك يا مان قعدتنا دي تكون محروم من النهاردة مفيش درة بلاش مفهوم..مفهوم ؟؟؟
روحت وتانى يوم في معاد الضرب جسمى اتكهرب كراكيب في ظهري ومناخيري سايلة وبتسرب
عاوز اضرب منين اجيب فلوس منين اجيب فلوس !! بدأت استلف من كل الى اعرفه وادوس
وحتى اخواتى خدت منهم ياما فلوس دروس كلو كرهنى وبيهرب منى ......
50 جنيبه في 50 في 100 في 100
بسرق يوماتى فلوس من البيت وكلو شك فيا نزلت بيعت كل حاجة جتلى في يوم هدية
خلصت فلوسي لحد ف يوم ما جتنى يوم فكرة هى هى
ذهب امى موبايل اختى لاب توب اخويا سرقتهم نزلت اهرب من البيت وقفنى ابويا
حاول يمنعنى مسكنى من ايدى جامد زقيته اتخبط في الحيط بصلي ازاي ابنو واذيتو
خد منى كل حاجة و تربس الباب غضب ساعتها طلبت اغرب حاجة ممكن تطلب
عاوز فلوس حالا ياما هرتكب جريمة اتهمنى بالجنون وادانى كام شتيمة
ببان كل الاوض بتتفتح عيلتى بتتفرج لسة بيستوعبو يمكن ده جد يمكن بيهرج
سحبت بنت اختى 3 سنين ناحية شباك هاتو الفلوس لارميها فجأة زاد الارتكاب
امى بكت بحرقة قدامى فقت ثوانى رمتلى فلوس وبصوت عالى مشوفش وشك تانى
امشي ملكش ام يا ابغض من شيطانى اخدت الفلوس ومشيت مش راجع بيتى تانى
قطر الحياة بيعدى بسرعة سنه فى سنه فى سنه و أنا زى مانا من يوم ماكان عندى سنه
هيا هيا الحياه هو هو أنا أنا زهقت طهقت من الحياة تقدر تقول مليت أنا
سبت كل اهلى وصحابي بقيت وحيد منين اجيب فلوس لازم القى طريق جديد
فجأة افتكرت جار من سنى ساكن لوحدو طول عمرو ابوه ف اعارة بره مصر و شهرى فلوس يبعتلو
شديته زي ما اتشديتت انا لنفس الطريق لقيت مصدر فلوس جديد وبيت و ايد صديق
نضرب سوا في بيته بفلوسه ملناش ظهور شقى سنين ابوه خلص في اربع شهور
وفي ليلة بنضرب جاتلو مكالمة مصدقهاش ابوه عرف ان ابنو بيسرقو اتنقل انعاش
كل عصب في جسمى توتر زودت الجرعة
الجرعة المعتادة خلاص مبقتش بتاُثر شريط حياتى بيتعرض اكبر في اكبر
ضربت السم في عروقي زودت اكتر و اكتر نفسي افنى واخلص من الدنيا زي المية اتبخر
كمان زودت سنة جسمى كلو اتلون اصفر صاحبي اتفزع قام واتسرع
مالك اصفر ليه يا جدع جسمك عرقان وبتترعش زي الى من الحية اتلدع
رغم انى غرقان في العرق جسمى مثلج موجوع وجع من خضتى جيت اسلب طولي جسمى على الرض اترزع
جسمى رافض لكل امر منى القوة اتهدت والدنيا بتظلم تدريجى واحدة واحدة اسودت
اخر لقطة في حياتى شوفتها كانت ماساة صاحبي مرعوب وبيراقب فراقي للحياة
قطر الحياة بيعدى بسرعة سنه فى سنه فى سنه و أنا زى مانا من يوم ماكان عندى سنه
هيا هيا الحياه هو هو أنا أنا زهقت طهقت من الحياة تقدر تقول مليت أنا
عمري بسرعه انتهي رجعت شريط حياتي ملقتش فيه حاجه عدله تتذكرلي عملتها
حياتي راحت مني راحت مني كلها ضيعتهاا ندمان علي كل لحظه غامقه في يوم انا عشتها !
يارب اديني فرصه تاني ارجع للحياه همشي في طريق صح لحد اخر منتهاه
دي حاجه صعبه فعلا انك تختفي من الدنيا وناس متفتكركشي بحاجه حلوه لوجه الله
0 التعليقات:
إرسال تعليق